Monday, September 24, 2018

ඒ නුඹමද

වැව් තාවුල්ලේ කුඹුක් සෙවන යට
නුඹ මා හමු වුන සොදුරු සැදෑවක
කොපුලත හාදුව තැවරුනු මොහොතේ
විලියෙන් ඇඹරුනු සුරතලියද නුඹ

පාට දිරාගිය ගොර හඩ නංවන
ලංගම බසයක අසුනක කෙරවල
දහසක් නෙත් යුග මානෙන් සැගවී
දෑගිලි පැටලූ පෙම්බරියද නුඹ

නෙ'තග ආදරෙන් කදුලු පුරෝගෙන
මළහිරු කිරණට මුහුන හොවාගෙන
වෙල් ඉපනැල්ලේ පවනට රහසින්
සුසුම් ඉතිරිකල සදවතියද නුඹ

කරදහියෙන් තැනු මාලිග කුටියක
ඉරුණු තැනෙක සළුපිලි බිම අතහැර
නුඹටත් රහසින් ලොවට පෙනෙන්නට
හසුන් මුදාහල පෙම්වතියද නුඹ

නිමිත්ත :-
තම පළමු පෙම්වතියගේ නිරුවත් වීඩීයෝ පටයක් අන්තර්ජාලයේ සැරිසරනු දුටු තරුණයෙකි....

Sunday, August 26, 2018

ලී කෙලි වන්නම්

පදුරු බටලී සොයා ගන්නට
තැනක් නැති කොන්ක්‍රීට් වනේ
සොයා යකඩින් තැනූ බට ලී
ලී කෙලි නැටුමක් රගදෙතේ

සරුව පිත්තල ඇගේ ලා ගෙන
එලි මැදින් දිදුලන ලදේ
උඩැක්කි හොරනෑ හේවිසි අතහැර
වන්නම් සව්දම් නදදෙතේ

කරත්ත පැල් කවි රගහල අසබඩ
යකඩ කටෙන් අඩහැර ඇසේ
අදුරට සමවැද දෙපැයක හිරවී
ගැමි ගී රසයක කිමිදෙතේ

වෙල් ඉපනැල්ලක කමතක කුබුරක
යන්නට පිං නැති මංපෙතේ
රගහල පසුකර නියෝන් එලිමැද
දඩු මොනරෙක නැග ඉගිලෙතේ

ප්‍රදීප් ලක්ෂිත
2018 | 08 | 15